நதியில் மிதக்க விட்ட கவிதை .

 நதியில் மிதக்க விட்ட கவிதை .

நதி நிலவைச் சுமந்த

ஒரு முன்னிரவு நேரத்தில்

பேருந்து பாலத்தில் ஓடியது .

ஜன்னலோர இருக்கையிலிருந்த

எனது பார்வையில்

நதியும்

அதில் மிதக்கும் நிலவும்

பட்டபோது

சட்டென்று தோன்றியதால்

மனதிலிருந்த எனது கவிதையில்

ஒன்றை வீசியெறிந்தேன்

ஜன்னல் வழியே வெளியே .

மிதக்க விட்ட கவிதையை

மறந்து விட்ட

ஒரு முன்மாலை நேரத்தில்

இலேசாய் வெளிச்சம் போர்த்திய

நதியின் கரையில்

நின்றிருந்த போது

தூரத்தில்

மிதந்து வந்து கொண்டிருந்தது

என் கவிதை

நிலவின் கைகளைக் கோர்த்தபடி

மேலும் அழகு கூடி .

 [ புதுப்புனல் டிசம்பர் 2014 ] 

 [ மலைகள் இணைய இதழ்  - 63 ஆவது இதழ் – டிசம்பர் 2 , 2014 ]

கவிழாத படகுகள் .

கவிழாத படகுகள் .

இளம் வயதில் தோன்றிய

தனித் தீவுக் கற்பனைகள்

இன்னும் மறக்கப் படாத ரகசியங்களை

வழுக்கும் மேசையின்

இரு புறமும் அமர்ந்து

பறிமாறிக் கொண்ட நேரத்தில் ,

இனிய காற்றிலும் ,

ஆற்று நீரில் பட்டுத் தெளித்த

மழைத் துளிகளின் அழகிலும்

மனம் ஒன்றி ,

படகு கவிழ்ந்த பயணம்

வாய்க்காமலே போய் விட்ட

சோகத்தில் ஆழ்ந்ததினால்

கவிழாத படகின் பயணம்

ரசிக்கப் படாமலே

கழிந்து போய் விட்ட

இளம் வெயில் காலம் .

 [ மலைகள் இணைய இதழ்  - 64 ஆவது இதழ் – டிசம்பர் 17 , 2014 ]

கணிப்பு -

கணிப்பு .

அவர்கள் இவர்களுக்குள் .

இவர்கள் அவர்களுக்குள் .

தெரிந்தும் தேடிக்

கொண்டேதான் இருக்கிறார்கள் .

இவர்கள் அவர்களையும் .

அவர்கள் இவர்களையும் .

சுயமாக அமைத்துக் கொண்ட

சுவர்களுக்குள் ஒளிந்திருக்கும்

இருட்டில் தேடுவதால்

இது வரை

அவர்களால் இவர்களையும்

இவர்களால் அவர்களையும்

கண்டு கொள்ளவே இயல வில்லை .

எனினும்

தொடர்ந்து கொண்டேதான்

இருக்கிறது தேடல் .

சுவர்களில் துளை போட்டு

உருவாகும் வெளிச்சத்தில்

அவர்கள் இவர்களையும்

இவர்கள் அவர்களையும்

கண்டு கொண்டு

ஒன்றாக ஆகிப் போகலாம் ;

அல்லது

அவர்கள் இவர்களாகவும்

இவர்கள் அவர்களாகவும்

மாறியும் போகலாம் .

எல்லாமே ஒரு கணிப்புதான் .

[ மலைகள் இணைய இதழ்  - 63 ஆவது இதழ் – டிசம்பர் 2 , 2014 ]

நன்றி : மலைகள் இணைய இதழ்

பதிவுகள்.

பதிவுகள்.

எல்லாவற்றையுமே

ஞாபகத்தில் பதிந்தாகி விட்டது.

ஒவ்வொரு கணமும்

தெளிவாக

மூளையின் ஒவ்வொரு பகுதியில்.

மனதில் துடிப்பு

ஒவ்வொரு கணத்தையும்

மீண்டும் வாழ –

உறைந்த ஞாபகங்கள்

மீண்டும் உயிர் பெற –

எதிர் காலமும்

கடந்த காலமாகவே மாற –

எனினும்

எதுவும் செய்யாது

நினைத்துக் கொண்டும்

கனவுகளில் குளித்துக் கொண்டும்

எப்போதும்

நம்பிக்கையோடு

மனிதர்கள் .

 [ வலைப்பதிவிற்கு பின்  மலைகள் இணைய இதழ்  - 64 – டிசம்பர் 17 , 2014  இதழிலும் பிரசுரமாகியுள்ளது ]