வெற்று வெட்டு .

வெற்று வெட்டு .

வெட்டுதல்கள் நடை பெற்றுக்

கொண்டேதான் இருக்கின்றன .

அவ்வப்போது நானும் வெட்டுவதுண்டு

நகங்களை –

அளவுக்கு மீறி வளர்ந்ததினால் ;

தினமும் மனைவி வெட்டுகின்றாள்

விதவிதமான காய்கறிகளை –

உணவுக்காக ;

நேஷனல் சலூன் நயினார்

வெட்டிக் கொண்டே இருக்கிறார்

தலை மயிர்களை .

வீதி வீதியாகக் கூவித் திரியும்

வீரராகவன்

ஏதேனும் ஒரு வீட்டு மரமேறி

வெட்டித் தள்ளுகிறார்

தேங்காய்க் குலைகளை .

நூற்றுக் கணக்கில் வெட்டித்

தள்ளப் படுகின்றன

ஆடுகளும் கோழிகளும்

அம்மன் கோயில் கொடையன்று .

ஒட்டகங்கள் கூட வெட்டுப் படுகின்றன

குர்பாணி நோக்கத்தோடு .

ஒவ்வொரு வெட்டுக்கு பின்னும்

எதோ ஒரு காரணமும்

எதோ ஒரு தேவையும்

இருக்கத்தான் செய்கின்றது .

ஆனால்

சில சமயங்களில்

மனிதர்கள் ஒருவரை யொருவர்

வெட்டிக் கொள்(ல்)வது

ஏன் என்றுதான் புரியவேயில்லை

எத்தனை யோசித்தும் .  

[ இனிய உதயம் ஜனவரி 2015 ]

சற்றே ....

வழியும் வியர்வை துடைத்து 
வரிசையில் நில்
அடுத்தவன் மூச்சை சுவாசித்து 
தலைவனின் படம் பார்
மைக்கேல்ஜாக்சன் அலறல்களுக்கு 
கை கால் உதறு
பச்சை சுரிதாரை பார்வையில் நிறுத்து
தவறென்று தெரிந்தும் 
மனதால் பிறன் மனை விழை
ஸ்டாரும் ,  சன்னும்
இன்னும் பலவும் 
இடை விடாது ரசி
வேலைக்காக அலைந்து திரி
வெறுப்பில் கல்லெறி .
பாட்டிலைத் திறந்து குடி
மேடைப் பேச்சுகளில் வாய் பிளந்து 
கை தட்டு
யாருக்கேனும் வாக்களி
அன்புக்குரிய தலைவனின் 
பிறந்த நாளுக்கு சுவரொட்டி ஒட்டு
பிடிக்காதவன் முகத்தில் சாணியடி
எல்லாமும் செய் 
என் தலைமுறையே !
அத்தோடு 
சக மனிதனை நேசிக்கவும் 
கற்றுக் கொள் 
சற்றே ....

[ இனிய உதயம் ஆகஸ்ட் 2014 ]

சப்தங்களில் கரைந்த குரல் .

அம்மன் கோவில் கொடைக்காக

பழையனூர் நீலி வில்லுப் பாட்டு .

பெருமாள் கோவிலில் புதிதாகப் பொருத்திய

ஒலி பெருக்கியில்  உருகி வழியும்

சுப்ரபாதம் .

கர்த்தரை காட்ட உறுதியளிக்கும்

சகோதரரின் உணர்ச்சி உரை .

அல்லாவைத் தொழ பள்ளிவாசலில்

அடிக்குரல் அழைப்பு .

வாக்குக்காக வாக்குறுதிகளை விசிறும்

துண்டணிந்த தலைவர்களின்

நீட்டிய முழக்கங்கள் .

நட்சத்திர நடிகர் , நடிகைக்காக

உயிரளிக்கத் துடிக்கும் கோஷங்கள் .

கூடுதல் சம்பளத்துக்காக கூக்குரலிடும்

தோழர்களின் உரிமை கோரல்கள் .

வீடுகள் தோறும்

முடிவே இல்லாத தொடர்களில்

முடியவே முடியாத அழுகைச் சப்தங்கள் .

இல்லையெனில்

சிக்ஸர்களைத் தொடரும் ஆரவாரங்கள் .

பண்பலை வரிசையில்

இரவும் பகலும் சங்கீத கலக்கல்கள் .

இத்தனைக்கும் மத்தியில்

தெருவோரக் கிழவனின் பசிக் குரல்

யார் காதிலும் விழாமல்

இறந்து போனான் கிழவன்

போன வாரம் .

[ இனிய உதயம் ஜீன் 2014 ]

 நன்றி : இனிய உதயம் .