உணர்வுகளும் உணர்வுகளும் .

எண்ணிலடங்கா உணர்வுகளை

புரிந்து கொள்ள முடிகிறது .

என்னிலடங்காத உணர்வுகளைத்தான்

என்ன செய்வதென்று

தெரியவே இல்லை .

[ புதுப்புனல் பிப்ரவரி 2015 ]

மேகங்களின் அழுகை .

பகலில் பகலவனின் வெம்மை

தாளாது அழ நேரிடுகின்றது

இரவில் நிலவின் குளிர்ந்த அன்பு

அழ வைக்கின்றது

இப்படி அவ்வப்போது யாராலாவது

மேகங்கள் அழ வைக்கப் படுகையில்தான்

கொஞ்சமேனும் குளிர்கிறது பூமி .

[ புதுப்புனல் பிப்ரவரி 2015 ]

மீட்கப் பட்ட ஏதேன் தோட்டக் கனி .

மீட்கப் பட்ட ஏதேன் தோட்டக் கனி .

இரக்கம் வந்தது மனிதன் மீது.

இறங்கி வந்தார்

கடவுள் தரைக்கு...

மூட்டையாக்கிச் சுமந்து சென்றார்

மனித பாவங்களை தலை மீது ...

இளைப்பாற நினைத்து

இறக்கி வைத்து

இமைகள் செருகி

தூங்கி எழ மூட்டையில்லை ...

வைத்த இடத்தில் .

”” பாவமே இல்லாமல்

வாழ்வது எப்படி ? “

தூரத்தே நின்று

மனிதன் கேட்டான்

மூட்டையைப் பிரித்தவாறு ... !

[ பாக்யா பிப்ரவரி 13 – 15 ; 2015 ]

கசிவு

எப்படி குவிப்பினும் தேக்க இயலாது

விரல்கள் வழி விரையும் ஆற்று நீராய்

கசிந்து கொண்டேயிருக்கின்றன

வாழ்வின் சந்தோஷமான கணங்கள்

குவியும் கவலைகளையும் மீறி .

[ புதுப்புனல் பிப்ரவரி 2015 ]

தழல் .

பற்றியெரிந்த நெருப்பு

முற்றிலுமாக அணைந்து விட்டது

எஞ்சியிருக்கும் சாம்பல்

ஏங்குகிறது இன்னொரு பொறிக்காக

வாட்டும் குளிர் போக்க .

[ புதுப்புனல் பிப்ரவரி 2015 ]

பயணம் .

பாய்மரப் படகில்

காற்றின் திசையில் பயணம் .

பயணக் களைப்பில்

மனம் தேடியது

நிலம் தெரியாதாவென்று

கண்கள் சோர்ந்து போகும் வரை .

தேடலின் முடிவில்தான்

தெரிந்தது

இத்தனை நாளாய்

படகு பயணித்ததே

தரையில்தான் என்று .

[ புதுப்புனல் பிப்ரவரி 2015 ]

நம்பிக்கை .

நம்பிக்கை .

456

எட்டாவது குறுக்குத் தெரு

குறிஞ்சி நகர்...

பலமுறை போய் வந்த முகவரிதான் .

வேகாத வெயிலில்

அலைந்து திரிகிறேன் .

திசைகள் மாறாவிடினும்

வீடு வந்து சேர வில்லை இன்னும் .

கேட்கப்படும் ஒவ்வொருவரிடமிருந்தும்

வெளிப்படுகின்றன

வெவ்வேறு விதமான வழிகாட்டுதல்கள் .

பசி மறந்து நடக்கின்றேன்

வழி தவறி விடக்கூடாதேயென்ற

பதட்டத்துடன் .

தெரிந்த அடையாளங்கள்

தேய்ந்து போயிருந்தன .

காலத்தின் ஓட்டத்தில்

நகரம் மாறித்தான் இருக்கிறது .

கதவிலக்கம் மாறியிருக்கலாம் ;

தெருப் பெயரும் மாறியிருக்கலாம் ;

குறிஞ்சி நகர் கூட வேறொரு

நகராக மாறியிருக்கலாம் .

தளராது நடக்கிறேன்

நண்பன் மாறியிருக்க மாட்டான்

நட்பும் மாறியிருக்காதென்ற

அசைக்க முடியா நம்பிக்கையோடு .

[ கணையாழி பிப்ரவரி 2015 ]