வெற்று வெட்டு .

வெற்று வெட்டு .

வெட்டுதல்கள் நடை பெற்றுக்

கொண்டேதான் இருக்கின்றன .

அவ்வப்போது நானும் வெட்டுவதுண்டு

நகங்களை –

அளவுக்கு மீறி வளர்ந்ததினால் ;

தினமும் மனைவி வெட்டுகின்றாள்

விதவிதமான காய்கறிகளை –

உணவுக்காக ;

நேஷனல் சலூன் நயினார்

வெட்டிக் கொண்டே இருக்கிறார்

தலை மயிர்களை .

வீதி வீதியாகக் கூவித் திரியும்

வீரராகவன்

ஏதேனும் ஒரு வீட்டு மரமேறி

வெட்டித் தள்ளுகிறார்

தேங்காய்க் குலைகளை .

நூற்றுக் கணக்கில் வெட்டித்

தள்ளப் படுகின்றன

ஆடுகளும் கோழிகளும்

அம்மன் கோயில் கொடையன்று .

ஒட்டகங்கள் கூட வெட்டுப் படுகின்றன

குர்பாணி நோக்கத்தோடு .

ஒவ்வொரு வெட்டுக்கு பின்னும்

எதோ ஒரு காரணமும்

எதோ ஒரு தேவையும்

இருக்கத்தான் செய்கின்றது .

ஆனால்

சில சமயங்களில்

மனிதர்கள் ஒருவரை யொருவர்

வெட்டிக் கொள்(ல்)வது

ஏன் என்றுதான் புரியவேயில்லை

எத்தனை யோசித்தும் .  

[ இனிய உதயம் ஜனவரி 2015 ]